Jam 2 | MMX | STEP | Luvutnetak mi luvurinuk. Nemi mi nuunu parap Leeme Silok ne Iesu Karisito, mo i umsu mi lisisixam. Kuren la nemen mita lox asi laradi kopmen taasen silok teren la nemen mita lox aurut tara vetpes; ketla mina ven limixin axap ngan legesara.

aLur 15:6

James 2

Labalamu Atnedik Na Evan Mi Limixin Axap

1 Luvutnetak mi luvurinuk. Nemi mi nuunu parap Leeme Silok ne Iesu Karisito, mo i umsu mi lisisixam. Kuren la nemen mita lox asi laradi kopmen taasen silok teren la nemen mita lox aurut tara vetpes; ketla mina ven limixin axap ngan legesara. 2 Mo dola laradi nopnovos i ruuna laarung molot at lekngen la i siga lempanga singsiga nunuan la ia vubeles at loogu lotu atnimi, i lox avukat mene. La do laradi kopmen tempanga ren i siga lempanga maut mun, la neni i beles bok at loogu lotu, loklok atnimi ridu na epovo mun. 3 Ixo lox avukat do nemi mi lox asuusu loklok ngangao aleng ti nom laradi i siga lempanga singsiga nunuan la mi tong i rin do ni na lok ka loxot kitkis avukat; ketla ti laradi banbalo mi tong i rin, do ni na tu mun kopla na xis to vetpes kopla na xis kopok at laxangka parap lengkangkedek at limixin. 4 Mo do nemi mi lok na loklok, nemi mi lok laxakapmek, atla mi lox abulubun kepe limixin banbalo keneng at lotu atnimi. Na lodoxoma i lok kapmek aleng.

5 Luvutnetak mi luvurinuk orong. Nemi axap mina ronga ia. Luvuttadi mo di lok ngan lavanga gamasa at lemeren limixin at na lavatkangka, Moroa ga soxolik ka vam di kusu diba umsu mi lunuunu la dina nemen ngan lavaanat too at Linintoo ren. Neni ga paase alii i do nedi limixin di balamu i, diba lok ka loxot at Linintoo ren. 6 Ketla nemi mi lox abulubun kepe limixin banbalo. Nemi miklen i do, limixin nopnovos di lox abulu nimi la di lok kaka lempilas atnimi. Nedi vam nom di lok li nimi at lavapaase. 7 La di paase kapmek ti laasen avukat at ne Iesu, mo ne Moroa ga lox anarong nimi min.

8 Nemi miba lok levempanga ik mokso, mo do mina mu asu mo levelinga i silok aleng la ik lok keneng at Lovoang Kaala, mo i lok keretna, “Mina balamu limixin petpes ngan mi balamu nimi.” 9 Ketla do mi lox asi tara la mi lox aurut tara vetpes, nemi mi lok laxakapmek, la mira los polo vam Lenavolo at ne Moroa. La kerepmo mi lok ngan limixin tongtonga viribang. 10 Do taradi i mumu asu avukat Lenavolo at ne Moroa, ketla i ronga xepe loxot lixilik teren, i lok ngan neni ia los polo axap pam i. 11 I lok ngan i na. Moroa ga vaase levelinga keretna, “Nemen gat lelongka.” La ga vaase bok, “Nemen gat uta sev amet taradi.” Mo do mixo lok loklok ti elongka, ketla mi sev amet taradi, nemi mi los polo vam levelinga axap at ne Moroa la mi lok ngan limixin tongtonga viribang.

12 Lavapaase la loklok atnimi na lox avukat axap mila ne Moroa naba lok li nimi at lavapaase mo do loklok atnimi kopmen na epovo mi levelinga ren, mo ik lox asepmus nedik. 13 At lorooro atnimi do kopmen mina ruuna lebelemumu, Moroa naba vaxaru nimi at lavapaase la ni noxo lox asuusu lebelemumu ren tinimi. Loklok ti vaxaru tara at lavapaase ixo lox avukat solo, ketla loklok ti lox asuusu lebelemumu i lox avukat aleng.

Leven Gugu Nunuan Eburu Mi Lunuunu

14 Luvutnetak mi luvurinuk. Do taradi i tong i do i ruuna lunuunu, ketla kopmen teveloklok nunuan at lorooro ren, lunuunu ren i lok ngan lavanga gamasa la ixo epovo do lunuunu kerepmo na lox arooro i. 15 Dola luvutneton nimi xopla luvurinen nimi dik pakes ti levempanga singsiga, la kopmen dina lok ka epovo teveluxa anan 16 la do tara atnimi na vot pasa di la na lok tidi keretna, “Moroa na lox anarong nimi, mina nemen avukat la mina anan avukat,” ketla kopmen na lok tooro di mi lempanga singsiga la lempanga anan, mo levelinga ren kopmen na lok tooro di. 17 La at na langas bok, mo do lunuunu xusuk ik lok la kopmen teven gugu nunuan nak lox eburu min, mo lunuunu i ngan lavanga gamasa.

18 Taradi na lok keretna, “I lox avukat mun do lara i ruuna lunuunu la lara vetpes i ruuna leven gugu nunuan;” ketla nia a tong i rin keretna, “Do tara xopmen na lok teven gugu nunuan, neni xopmen na ruuna lunuunu. Nia a ruuna leven gugu nunuan, mo i lox asuusu lunuunu rak.” 19 I lox avukat do una nuunu do legesa Moroa xusuk mun. I ruturun, ketla lubunggas bok di nuunu xuren la dik marat aleng.

20 Mo laradi, neni lavanga baulang. Lunuunu ren i ngan lavanga gamasa mo do i ruuna lunuunu xusuk la kopmen teven gugu nunuan i nemen at lorooro ren. 21 Ana lox asuusu i do na levelinga rak i ruturun mi lorooro at ne Abaram. Lurubuno atdik ne Abaram ga ronga res at ne Moroa; ni ga raba lamdak teren ne Aisak ngan laplavang. La kerepmo ne Moroa ga tong i do ne Abaram ni laradi mokmokso. 22 I xasep do mo loklok at ne Abaram ga lox asuusu lunuunu ren la ga lox amuat lunuunu ren. 23 La loxot at Lovoang Kaala ga sorun keretna,

‘Abaram ga nuunu at ne Moroa la Moroa ga siam ka ba i ngan laradi mokmokso.’ ^a

La ne Moroa ga so asen ba i do lentangas teren.

24 Kuren la nemi axap mina ven avukar i do ne Moroa na lox asepmus laradi mo do i ruuna leven gugu nunuan eburu mi lunuunu. Do i ruuna lunuunu xusuk mun, ixo epovo.

25 La at na langas mun ne Raap, latkin ngarangat, gak mokso at lemeren ne Moroa. Neni ga lok tooro luradi likling boro Israel la ga riki du uto vetpes kusu limixin esep di noxo ranga alis du. 26 Kuren la mina xasep keretna, labantuxu kopmen toroonan teren, ni ira met pam; la kerepmo bok lunuunu kopmen teven gugu nunuan teren, ni ira met pam.